जुलाई ७, २०२४ आइतवार इबाराकी प्रिफेक्चरको माचुदा फार्म र शिमोता फार्ममा “इबाराकी प्रिफेक्चरका महिला कृषि विशेषज्ञहरूको सफलताबाट सिक्ने भ्रमण” सम्पन्न गरियो! जसमा जापानी कृषिमा रुचि राख्ने १२ जना नेपाली महिलाहरूको सहभागिता रहेको थियो।माचुदा फार्मले माटोको तयारी गर्दा देखिनै विशेष ख्याल गर्दै स्वादिष्ट तरकारीहरू उब्जाउँछ भने शिमोता फार्म जापानको पहिलो जडीबुटी खेतीको नेतृत्व लिएको कारण प्रसिद्ध छ।

सहभागिहरूले अर्गानिक तरकारी र जडीबुटीहरू उब्जाउदा ध्यान दिनुपर्ने कुरा सिक्नुका साथै, महिलाहरू आफ्नो क्षमता प्रयोग गरेर उत्पादनमा मूल्य बढाई कसरी सफल भइरहेका छन् भन्ने बुझेर आफ्नो भविष्यको लागि प्रेरणा पाए।भ्रमण स्वीकार गरिदिने फार्म मालिक श्रीमती माचुदाले भनिन्, ”मैले पनि धेरै सिक्न पाएँ, यो मेरो लागि धेरै मूल्यवान अनुभव भयो”। त्यस्तै अर्का फार्मका शिमोताले भने ”नेपालको बारेमा सुन्न पाएर खुशी लाग्यो, भविष्यमा पनि निरन्तरता दिन चाहन्छौं” । यसरी भ्रमणको बारेमा खुशीका सन्देशहरू प्राप्त भएका थिए।

२०२४ सालको जुलाई २७ (शनिबार) मा कुमामोतो प्रिफेक्चर तोबाशेजीमाको मियागावा योउरानको भ्रमण गर्ने स्टडी टुर कार्यक्रम सम्पन्न भयो जसमा ९ जनाले भाग लिएका थिए।

मियागावाजीले “सुन्दर फूलहरूले मानिसहरूको मुहारमा मुस्कान ल्याउन चाहन्छु” भन्ने आदर्शका साथ सुनाखरी फूल व्यवसाय मार्फत स्थानीय क्षेत्रको विकासमा योगदान पुर्‍याउँदै जनसंख्याको अभाव भएको तोबाशेजिलाई समृद्ध बनाउन फ्यामिलीलाई आकर्षित गर्ने पर्यटक कृषि फार्म सञ्चालन गर्छन्। यसबाहेक, जंगली बँदेलको क्षति रोक्नका लागि बँदेलको शिकार गर्ने बिजनेसमा पनि संलग्न छन्।

सहभागीहरूले मियागावाजीका विभिन्न चुनौतीहरूलाई ध्यानपूर्वक सुने र कृषि फार्मको भ्रमणपछि पर्यटक कृषि फार्मको एक भागको रूपमा रहेको ब्लूबेरी पिकिंङ्गको अनुभव पनि गरे जसले समग्र अध्ययनलाई अझै गहन बनायो। सहभागीहरूबाट “जहाँ हेरे पनि व्यापारको अवसर देख्न सक्ने भएको छु” .. “समस्या पनि व्यापारमा परिणत गर्न सकिन्छ भन्ने थाहा भयो” जस्ता प्रतिक्रिया प्राप्त भए। साथै भ्रमणका समन्वयक मियागावाजीबाट “सबैले प्रतिक्रिया राम्रो दिएको र धेरै प्रश्नहरू सोधिएकोमा खुशी लाग्यो फेरि आउनुहोस्।” भन्ने सन्देश प्राप्त भयो।

२०२४ नोभेम्बर ९ (शनिवार) का दिन कुमामोतो प्रिफेक्चरको आसो यामानामी रिसोर्ट होटल र गोल्फ क्लबमा स्टडी टूर सम्पन्न भयो जसमा १२ जना सहभागी भएका थिए।

प्रबन्धक चोनले घाटामा गएको गोल्फ क्लबलाई पुनरुत्थानको लागि नेतृत्व गरे। हाल वार्षिक करिब ५०,००० कोरियाली पर्यटकहरूलाई गल्फ स्थलमा आकर्षित गर्न सफल भएका छन्, साथै यसमा कोरियाली सदस्यहरूको संख्या १७०० भन्दा बढी पुगेको छ। यसबाहेक ६ विभिन्न देशका कर्मचारीहरू कार्यरत यहाँ विदेशी कर्मचारीहरूलाई सक्रिय रूपमा काम दिइन्छ। जापानमा उद्यम सुरु गरेका चोन प्रबन्धकले जापानको ३० वर्षभन्दा बढीको अनुभव, त्यो अवधिमा जापान र कोरियाबीचको पर्यटन व्यवसायमा भएका परिवर्तनहरू, उनले भोगेका विभिन्न असफलताहरू र चुनौतीहरू तथा ती समस्याहरूलाई कसरी पार गरे भन्नेबारे आफ्नो अनुभव सुनाए। त्यसपछि संरचनाहरूको निरीक्षण र नेपाली कर्मचारीहरूसँग अन्तर्क्रिया गरिएको थियो।

सहभागीहरूले, “प्रबन्धक चोनको व्यवसायमा गरिएको प्रयास र सफलताका लागि लिनुभएको चुनौतीबाट प्रेरणा प्राप्त भयो,” .. “पर्यटन व्यवसायमा घाटा र नाफाको बारेमा सिक्दै, आत्मविश्वासका साथ अगाडि बढ्नु महत्त्वपूर्ण रहेछ भन्ने महसुस भयो” भन्ने जस्ता प्रतिक्रिया व्यक्त गरे।

२०२४ को नोवेम्बर १६ (शनिबार) मा इबाराकी प्रान्तको र्युगासाकी शहरस्थित योकोता कृषि फार्मको अध्ययन भ्रमण सम्पन्न भयो, जसमा १३ जना नेपाली महिलाहरू सहभागी भएका थिए।

योकोता फार्म १७० हेक्टर (टोक्यो डोमको ४० गुना) क्षेत्रमा फैलिएको ठूलो फार्म हो। यहाँ अत्याधुनिक प्रविधिको प्रयोग गर्दै, ‘जापानको चामलको भविष्यलाई समृद्ध बनाउने’ लक्ष्यका साथ रासायनिक मल र कीटनाशक बिना जैविक खेती गरिन्छ। त्यसका साथै, योकोताजी साना बालबालिकाहरूलाई कृषिको अनुभव दिने, बिभिन्न डिजाइन गरिने माकि सुशी र चामलको पिठोबाट मिठाइ बनाउने वर्कशपहरु सञ्चालन गर्ने र खाद्य र कृषि शिक्षा दिने कार्यमा पनि सक्रिय रूपमा संलग्न छन्। सहभागीहरू जापानको नयाँ कृषि प्रविधिमा चकित हुँदै, योकोताजीको कार्यबाट कृषिको महत्त्व र जापानको चामल संस्कृतिबारे सिक्नुका साथै फूलका ढाचामा सुशी रोल बनाउने अनुभव गर्न पाउदा रमाइलो माने।

सहभागीहरूबाट “नयाँ प्रविधीको कृषि बारे जान्न सकेर नयाँ अनुभव प्राप्त गरें”.. “योकोताजीले स्वादिष्ट चामल बनाउनुका साथै भविष्यमा बच्चाहरूलाई खाद्यान्न र कृषि शिक्षा पनि प्रदान गर्दै हुनुहुन्छ त्यो गज्जब छ। मलाई उत्साह प्राप्त भयो..” जस्ता प्रतिक्रिया प्राप्त भए। साथै भ्रमणका समन्वयक योकोताजीबाट “विदेशी व्यक्तिहरूसँग कुरा गर्ने अवसर त्यति हुँदैन, त्यसकारण यो अनुभव रमाइलो थियो साथै मैले धेरै कुरा सिकें।” भन्ने सन्देश प्राप्त भयो।

डिसेम्बर १४, २०२४ (शनिबार)，यामानाशी प्रान्तको मिनामी आल्प्स सिटीमा स्टडी टुर आयोजना गरिएको थियो जसमा टोकियोको सुगिनामी वार्ड स्थित एभरेस्ट इन्टरनेशनल स्कूल (EISJ) का शिक्षक र कर्मचारीहरू १२ जना सहभागी भएका थिए। EISJ जापानमा नेपाली विद्यार्थीहरूको लागि स्थापित एकमात्र इन्टरनेशनल स्कूल हो, जसमा किंडरगार्टनदेखि हाइ स्कूल कक्षा १२ सम्ममा लगभग ५०० जना विद्यार्थीहरू अध्ययन गरिरहेका छन्।

फलफूल खेती र पर्यटन फार्म सञ्चालन गर्ने “तेजुका फलफुल बगैचा” र उच्च गुणस्तरीय कृषि उत्पादन प्रशोधन, (अदुवा सिरप) निर्माण र बिक्री गर्ने “SOIL कम्पनी”, यामानाशी प्रिफेक्चरको मिनामी अल्प्स सिटीद्वारा सञ्चालित “हात्ता कृषि प्रशोधन केन्द्र”, “JA मिनामी अल्प्स सिटी कृषि उत्पादनको प्रत्यक्ष बिक्री केन्द्र (मिचिनो एकी शिराने)”, सार्वजनिक र निजी क्षेत्रको साझेदारीको लगानीमा नयाँ विकास भइरहेको क्षेत्रीय सञ्जाल आदान प्रदान क्षेत्र “fumotto मिनामी आल्प्स” मारुसेको भ्रमण गरेर कृषि व्यवसाय (भ्यालू चेन) को वास्तविकताबारे बुझाइ र अनुभव प्राप्त गरियो।

सहभागीहरूले भविष्यमा नेपाल फर्किएपछि रोजगार वा व्यवसाय सुरु गर्नका लागि धेरै महत्वपूर्ण ज्ञान र सुझाव प्राप्त गरे। साथै जापानको एक ठूलो नेपाली समुदाय रहेको EISJ र त्यसका सम्बन्धित व्यक्तिहरूमा CDE परियोजनाको आगामी प्रभावको पनि अपेक्षा गरिएको छ।